Sunday, May 05, 2013

ഇരിപ്പിടം ഉയർത്തുന്ന ചോദ്യങ്ങൾ


രു ജനാധിപത്യ സമൂഹത്തിൽ, മറയത്തിരുന്നു പ്രസിദ്ധപ്പെടുത്തുന്ന നിരൂപണങ്ങൾ ആ സമൂഹത്തിനു ആത്യന്തികമായി ഗുണമാണോ ദോഷമാണോ ഉണ്ടാക്കുന്നത് ? ഓരോ സമൂഹത്തിന്റെയും ജനാധിപത്യസ്വഭവത്തിനനുസരിച്ച് അതിൽ ഏറ്റക്കുറച്ചിലുകൾ ഉണ്ടാകുന്നുണ്ടോ ? ബ്ലോഗർമാരുടെ ഒരു സമൂഹത്തിൽ, ഏതാനും ബ്ലോഗർമാർ മറഞ്ഞിരുന്ന് പ്രസിദ്ധീകരിക്കുന്ന നിരൂപണങ്ങൾ ബ്ലോഗർ സമൂഹത്തിനു മൊത്തത്തിൽ ഗുണകരമാണോ ?

പറഞ്ഞു വരുന്നത് ‘ഇരിപ്പിടം’ ബ്ലോഗ് അവലോകന  ദ്വൈവാരികയെ കുറിച്ചാണ്. ബ്ലോഗറും പത്രപ്രവർത്തകനുമായ ശ്രീ. രമേശ് അരൂർ ആണ് പ്രസ്തുക ബ്ലോഗിന്റെ ഉടമ എന്ന് മനസ്സിലാക്കുന്നു.  2011 ജൂലൈ     മുതൽ ബ്ലോഗ് അവലോകനങ്ങൾ എഴുതി തുടങ്ങിയ ഇരിപ്പിടം, ഏതാനും ലക്കങ്ങൾ കൊണ്ടു തന്നെ (ആദ്യകാലത്ത് മാസികയായിരുന്നു) ബ്ലോഗർമാർക്കിടയിൽ ശ്രദ്ധിക്കപ്പെട്ടു. ശ്രീ, രമേഷ് അരൂർ,  ചന്തു നായർ, ശ്രീ. വി എ കൊടുങ്ങല്ലൂർ,ശ്രീമതി ലിപി രഞ്ജു, തുടങ്ങിയവരാണ് ആരംഭകാലത്ത് അവലോകനങ്ങൾ എഴുതിയിരുന്നത്. പിന്നീട്, പ്രശസ്തരും  അപ്രശസ്തരുമായ പല ബ്ലോഗർമാരും ഇരിപ്പിടത്തിൽ അവലോകനങ്ങൾ എഴുതി. ഓരോ ലക്കത്തിലും, ആ ലക്കത്തിന്റെ നിരൂപണം തയ്യാറാക്കിയ വ്യക്തിയുടെ പേരും അയാളുടെ ബ്ലോഗ് വിലാസവും ഇരിപ്പിടത്തിൽ പ്രസിദ്ധപ്പെടുത്തിയിരുന്നു. അവലോകനം എഴുതാൻ ബ്ലോഗർമാരെ കിട്ടാതായി തുടങ്ങിയതോടെ, ഇരിപ്പിടത്തിന്റെ പ്രസിദ്ധീകരണം പ്രതിസന്ധിയിലകപ്പെടുകയും 2012 ജൂലൈ  അവസാനത്തോടെ ഇരിപ്പിടം പ്രസിദ്ധീകരണം അവസാനിപ്പിക്കുകയും ചെയ്തു.

( ഇരിപ്പിടത്തിൽ നിന്നു തന്നെ മനസ്സിലാക്കിയ കാര്യങ്ങളാണ്. തെറ്റു ചൂണ്ടി കാണിച്ചാൽ തിരുത്താം )

തുടർന്ന്, ഇരിപ്പിടം പുനരുജ്ജീവിപ്പിക്കുന്നതിനെ സംബന്ധിച്ച് ശ്രീ നാമൂസ് പെരുവല്ലൂർ എന്ന ബ്ലോഗറുടെ നേതൃത്വത്തിൽ ചില ചർച്ചകൾ നടത്തുകയും ചില ബ്ലോഗർമാർ ചേർന്ന് ‘ഇരിപ്പിടം ടീം’ എന്ന പേരിൽ ബ്ലോഗ് അവലോകനം എഴുതി വരികയുമാണ് ഇപ്പോൾ ചെയ്യുന്നത്. ( ഈ ‘ടീമിൽ’ ആരൊക്കെയാണ് ഉൾപ്പെടുന്നത് എന്ന് ശ്രീ നാമൂസ് പെരുവല്ലൂരിനും  ഇതിൽ ഉൾപ്പെട്ടവർക്കും അവരുടെ ചില സുഹൃത്തുക്കൾക്കും അറിയാമെന്നാണ് മനസ്സിലാക്കുന്നത് )

പേരു വയ്ക്കാതെ നിരൂപണം എഴുതുന്നതിലെ അനൗചിത്യം, ഇരിപ്പിടത്തിന്റെ ആദ്യകാല സാരഥികളിലൊരാളായ ശ്രീ ചന്തുനായർ, ഇരിപ്പിടം 51 ആം ലക്കത്തിൽ തന്റെ ഒരു കമന്റിലൂടെ ചൂണ്ടി കാട്ടുകയും ഇതെഴുതുന്നയാൾ അതിനെ പിന്തുണച്ച് അഭിപ്രായം പ്രകടിപ്പിക്കുകയും ചെയ്തതോടെയാണ് ഇത് സംബന്ധിച്ച ചർച്ചകൾ ആരംഭിക്കുന്നത്.

“ഇരിപ്പിടത്തിന്റെ പിന്നിലുള്ള വ്യക്തികള്‍ക്ക് യാതൊരു പ്രാധാന്യവും ഇല്ല എന്നതും, ടീം എന്ന നിലയില്‍ അത് മുന്നോട്ടുവയ്ക്കുന്ന ആശയങ്ങള്‍ക്കാണ് പ്രാധാന്യം എന്നതും മാന്യവായനക്കാര്‍ തിരിച്ചറിയുക. വ്യക്തികളെ അന്വേഷിക്കുന്നതില്‍ നിന്നും പിന്മാറി കുറേക്കൂടി ക്രിയാപരവും ജനാധിപത്യപരവുമായ ആശയസംവാദത്തിന്റെ വഴികളിലൂടെ നാളത്തെ ബ്ലോഗെഴുത്തിന് ശക്തി പകരാനുള്ള പ്രവര്‍ത്തനങ്ങളില്‍ പങ്കാളികളാവണമെന്നും അഭ്യര്‍ത്ഥിക്കുന്നു”.

എന്ന ഇരിപ്പിടത്തിന്റെ നിലപാടിനു മറുപടിയായി നൽകിയ

“ഇരിപ്പിടം മുന്നോട്ടു വയ്ക്കുന്ന ഈ അഭിപ്രായത്തോട് വിയോജിപ്പുണ്ട്. അതൊരു അഭിനയത്തിന് ആ ഗ്രൂപ്പിലുള്ള മുപ്പതു പേർക്കും അവസരം നൽകുന്നു എന്നതു തന്നെ കാരണം.

നിസാരന്‍ എന്ന നിസാറിന്റെ നിസർഗം ബ്ലോഗിലെ 'തളിരിലവര്‍ണ്ണങ്ങള്‍ ' എന്ന രചനയുടെ തുടക്കത്തില്‍ നാം കാണുന്ന സൂക്ഷ്മ നിരീക്ഷണപാടവവും എഴുത്തിലെ ഏകാഗ്രതയും ഭാഷയുടെ മികവും പിന്നീട് നഷ്ടമാവുന്നു. രണ്ടാം ലോകമഹായുദ്ധരംഗവും, കട്ടന്‍ ചായയും പട്ടാളക്യാമ്പുകളും ഉത്തരേന്ത്യയിലെ വര്‍ണവെറിയുമൊക്കെ ഒന്നിനുപിറകെ ഒന്നായി, അവ്യക്തങ്ങളായ ചെറുരംഗങ്ങളായി വായനക്കാര്‍ക്കു മുന്നിലെത്തുമ്പോള്‍ ഏകാഗ്രത നഷ്ടമാവുന്ന വായന എങ്ങുമെത്താതെ പോവുന്നു. എന്നാല്‍ 'ഈ എഴുത്തിലെ ദൃശ്യ ഭാഷക്ക് സ്നേഹ സലാം....' എന്നും 'ഹോ അപാരമായ എഴുത്ത്.....' എന്നും മറ്റും പല വായനക്കാരും ഈ പോസ്റ്റ് ചൂണ്ടിക്കാട്ടി കൈയ്യടിക്കുമ്പോള്‍ മുമ്പെ ഗമിച്ചീടിന ഗോവു തന്റെ പിമ്പെ ഗമിക്കും ബഹുഗോക്കളെല്ലാം എന്ന പ്രമാണം ബ്ലോഗെഴുത്തിലെ കമന്റുകളുടെ കാര്യത്തിലാണ് ഏറ്റവും അനുയോജ്യമാവുക എന്നു തോന്നിപ്പോവും. 'ഒരു ചായയുണ്ടാക്കിയ കഥ' എന്ന് ഒറ്റവരിയില്‍ വിളിക്കാവുന്ന ഈ പോസ്റ്റ് വായിച്ച ചിലർക്കെങ്കിലും അവരുടെ വായനയുടെ പരിമിതികളെക്കുറിച്ച് ആശങ്കയും തോന്നാം." എന്ന് ഇരിപ്പിടം 'ടീം' അഭിപ്രായപ്പെട്ട നിസാരന്റെ ബ്ലോഗ് തന്നെ പരിശോധിക്കാം.

അതിൽ ഇരിപ്പിടം ഈ നിരൂപണം നടത്തുന്നതിനു മുമ്പും ശേഷവുമായി 79 കമന്റുകൾ ഇന്നു വരെ കാണാനുണ്ട്. അതിൽ വിമർശനം എന്നൊക്കെ പറയാവുന്നത് ( മനസ്സിലായില്ല എന്നതുൾപ്പെടെ ) പത്തോളം കമന്റുകൾ. ബാക്കിയുള്ള 69 എണ്ണവും അഭിനന്ദനങ്ങളും ആശംസകളും അർപ്പിച്ചുള്ളവ. ഇങ്ങനെ അഭിനന്ദിക്കുകയും ആശംസിക്കുകയും ഒക്കെ ചെയ്ത 69 പേരിൽ ഈ 'ഇരിപ്പിടം ടീം'ഇൽ നിന്നുള്ള ആരും ഉൾപ്പെട്ടിട്ടില്ലെന്ന് ഇരിപ്പിടത്തിനു ഉറപ്പ് തരാനാവുമോ ? ഇരിപ്പിടം ടീമിൽ ഉണ്ടെന്ന് ഞാൻ വിശ്വസിക്കുന്ന പലരും അങ്ങനെ അഭിനന്ദിക്കുകയോ ആശംസിക്കുകയോ ചെയ്തവരിൽ ഉൾപ്പെട്ടിട്ടുണ്ടെന്ന് തന്നെ ഉറച്ച് വിശ്വസിക്കുന്നു.( ഇരിപ്പിടം ലക്കങ്ങളും നിസാരനു കിട്ടിയ കമന്റുകളും സൂക്ഷ്മമായി നിരീക്ഷിച്ചാൽ ചില വ്യക്തികളെയെങ്കിലും തിരിച്ചറിയാനാവും ) സ്വന്തം മുഖത്തിൽ വന്ന് ഒരഭിപ്രായവും , ഒരു കൂട്ടമായി മറഞ്ഞു നിന്ന് അതിൽ നിന്ന് മറ്റൊരു അഭിപ്രായവും ഒരാൾ പ്രകടിപ്പിക്കുമ്പോൾ അയാൾ ഒരിടത്ത് നാടകം കളിക്കുകയാണ് എന്ന് വ്യക്തം. അത്തരം നാടകക്കാരെ കൊണ്ട് സമൂഹത്തിനു എന്ത് പ്രയോജനം ?”

എന്ന ചോദ്യത്തിന് ഇതുവരെ ഇരിപ്പിടം മറുപടി നൽകിയിട്ടില്ല.

മറുപടി ലഭിക്കാതായതിനെ തുടർന്ന് ഇതേ ചോദ്യം ഇരിപ്പിടം ഫേസ് ബുക്ക് ഗ്രൂപ്പിൽ ഉന്നയിച്ചു. അവിടെ നിന്നും മറുപടി കിട്ടാതായപ്പോൾ ഇതേ പ്രശ്നം ചില ഗ്രൂപ്പുകളിൽ ചർച്ചയ്ക്കു വച്ചു. പ്രധാനമായും മലയാളം ബ്ലോഗേഴ്സ് ഗ്രൂപ്പിലും മലയാളം ബ്ലൊഗേർസ് ഗ്രൂപ്പിലും ആണ് ചർച്ച നടന്നത്.

അവിടെ നടന്ന ചർച്ചയിൽ നിന്ന്  വ്യക്തമായ കാര്യങ്ങൾ :

1. ക്രിയാത്മകവിമർശനം നടത്തുകയും നിഷ്പക്ഷമായ നിലപാട് സ്വീകരിക്കുകയും ചെയ്യുന്ന, ഉത്തരവാദിത്തപ്പെട്ട ഒരു  ഓൺലൈൻ ബ്ലോഗ് അവലോകനമാസികയെ പൊതുവെ എല്ലാ ബ്ലോഗർമാരും സ്വാഗതം ചെയ്യുന്നു.

2. ഇരിപ്പിടം ടീം മറഞ്ഞിരുന്നെഴുതുന്നതിനെ അംഗീകരിക്കുന്നവരും, അതിൽ അസ്വസ്ഥതയും അവിശ്വാസവും പ്രകടിപ്പിക്കുന്നവരും ബ്ലോഗേഴ്സിനിടയിൽ ഉണ്ട്.

3.ഇരിപ്പിടം ടീമിൽ അംഗമായവർ പലരും  മലയാളം ബ്ലൊഗേർസ്ഗ്രൂപ്പിലും അംഗമാണ്.

4. ഇരിപ്പിടം ടീമിൽ ഉൾപ്പെടുന്നത് ആരൊക്കെയാണ്, ഓരോ ലക്കവും തയ്യാറാക്കുന്നത് ആരൊക്കെയാണ്   തുടങ്ങിയ വിവരങ്ങൾ ഇരിപ്പിടം വെളിപ്പെടുത്താൻ തയ്യാറല്ല.

5.ഇരിപ്പിടം ടീം രഹസ്യസ്വഭാവം പുലർത്തിക്കോട്ടെ എന്ന് അവിടെ അഭിപ്രായപ്പെട്ടവരിൽ ഭൂരിഭാഗത്തിനും അവർ ആരൊക്കെയാണ് എന്നറിയാം. മുൻപൊരിക്കൽ, മറഞ്ഞിരുന്ന് വിമർശിക്കുന്നത് ഇരുട്ടത്തിരുന്ന് കല്ലെറിയലായും തന്റേടമില്ലായ്മയായും വിശേഷിപ്പിച്ച വ്യക്തികൾ പോലും ഇപ്പോൾ ഇരിപ്പിടം ടീം പുലർത്തുന്ന രഹസ്യസ്വഭാവത്തെ പിന്താങ്ങുന്നു.

 അവിടെ ചർച്ചയിൽ പങ്കെടുത്തവർ, ‘ഇരിപ്പിടത്തിന്റെ തീരുമാനത്തിൽ മാറ്റമില്ല’ എന്ന നിലപാട് പ്രഖ്യാപിച്ച് പിൻവാങ്ങുകയും കമന്റുകൾ ഡിലീറ്റ് ചെയ്യപ്പെടുന്നുണ്ടോ എന്ന സംശയത്തിനു വ്യക്തമായ മറുപടി ലഭിക്കാതിരിക്കുകയും ചെയ്തതോടെ , ഇതു സംബന്ധിച്ച ചർച്ചകൾ ബ്ലോഗിലേക്ക് മാറ്റുകയാണ് ഉചിതം എന്ന ചിന്തയോടെ വിഷയം ഇവിടെ അവതരിപ്പിക്കുകയാണ്.
ഉന്നയിക്കുന്ന പ്രധാന പ്രശ്നങ്ങൾ  ഇതെല്ലാമാണ്.

1. മറഞ്ഞിരുന്ന് ബ്ലോഗ് നിരൂപണം  എഴുതുന്നതുകൊണ്ട് ബ്ലോഗ് സമൂഹത്തിന് എന്തു ഗുണമാണ് പ്രത്യേകമായി ലഭ്യമാവുന്നത് ?

2. തങ്ങൾ നിഷ്പക്ഷരാണ് എന്നൊരു ഗ്രൂപ്പ് അവകാശപ്പെട്ടാൽ അത് അവർക്കു മാത്രം ബോധ്യപ്പെട്ടാൽ മതിയോ ? മറ്റുള്ളവരെ നിഷ്പക്ഷത ബോധ്യപ്പെടുത്താൻ അങ്ങനെയൊരവകാശവാദം മാത്രം                 മതിയോ ?

3.
ബ്ലോഗുകളിൽ 'അടിപൊളി, കൊള്ളാം, കിടിലൻ, സൂപ്പർ' തുടങ്ങിയ പുറം ചൊറിയൽ ( പുറം ചൊറിയാതെയും ) കമന്റുകളുണധികവും എന്നത് ബ്ലോഗുകളുടെ ആരംഭകാലം മുതലേ കേൾക്കുന്ന വിമർശനമാണ്. ക്രിയാത്മകമായ വിമർശനം വളരെ കുറവാണ് എന്നാണല്ലൊ അതിന്റെ സൂചന. എന്നാൽ തൂപ്പുകാരിയും ഇരിപ്പിടവുമെല്ലാം  വിമർശനങ്ങൾ ഉന്നയിക്കുമ്പോൾ ബ്ലോഗർമാരിൽ നിന്ന് അതിനെല്ലാം വമ്പിച്ച സ്വീകരണം ലഭിക്കുകയും ചെയ്യുന്നു. അതിൽ നിന്ന് മനസ്സിലാക്കാവുന്നതായി  തോന്നിയത്, ‘വിമർശനം വേണം, പക്ഷെ ഞാനായിട്ടത് ചെയ്യില്ല. ചെയ്താൽ എനിക്കു കിട്ടുന്ന കമന്റുകൾ കുറയും, എന്നോട് വിദ്വേഷമുള്ളവർ കൂടും’ എന്ന് ബ്ലോഗർമാരിൽ ഭൂരിഭാഗവും ഉള്ളിൽ കരുതുന്നുണ്ട് എന്നാണ്. ( ഇതാണു ഇരിപ്പിടത്തിലും ബ്ലോഗർമാർ മറഞ്ഞിരുന്നെഴുതുന്നതിനു പ്രധാനകാരണം എന്ന് വിശ്വസിക്കുന്നു )  

ഇതിന് മാറ്റം വരണമെങ്കിൽ, ബ്ലോഗർമാർ പരസ്പരം ക്രിയാത്മക വിമർശനത്തിനു തയ്യാറാവേണ്ടതുണ്ട്. അത്, സ്വന്തം സൃഷ്ടികളെയും വിമർശനാത്മകമായി സമീപിക്കാൻ ബ്ലോഗർമാരെ പ്രേരിപ്പിക്കുകയും തദ്വാരാ, ക്രിയാത്മകമായ ഒരു മാറ്റം ബ്ലോഗ് രചനകളിൽ സൃഷ്ടിക്കാൻ ഇടയാക്കുയും ചെയ്യും .( മറ്റുള്ളവരുടെ സൃഷ്ടികളിൽ അക്ഷരത്തെറ്റ് ആരോപിക്കുന്ന ഒരാൾ, സ്വന്തം സൃഷ്ടികളിൽ  അക്ഷരത്തെറ്റുണ്ടോ എന്ന് ആയിരം വട്ടം പരിശോധിക്കും.) പക്ഷെ ഇത് സ്വന്തം മുഖത്തോടെ ചെയ്യേണ്ടതുണ്ട്. പകരം, അവരിൽ കുറച്ചു പേർ മറഞ്ഞിരുന്ന് വിമർശിച്ചാൽ വിമർശനമേൽക്കുന്നവരിൽ ചിലപ്പോൾ മാറ്റമുണ്ടായേക്കാം. പക്ഷെ മറഞ്ഞിരിക്കുന്നവർ സ്വയം തിരുത്താനുള്ള സാധ്യത വിരളമാണ്. അവർ സ്വയം തിരുത്തുന്നുണ്ടോ എന്ന് മറ്റുള്ളവർക്കു പരിശോധിക്കാനും കഴിയില്ല. മാത്രമല്ല, ഇങ്ങനെ മറഞ്ഞിരുന്ന് വിമർശിക്കുന്ന പ്രവണത മറ്റുള്ളവരിലേക്ക് പടരാനും സാധ്യതയുണ്ട്. ഫലത്തിൽ, മറഞ്ഞിരുന്നുള്ള വിമർശനം കൊണ്ട് ചിലർക്ക് ഗുണം ഉണ്ടാക്കിയേക്കാമെങ്കിലും ബ്ലോഗെഴുത്തുകാർക്കിടയിൽ അസ്വസ്ഥതയും പരസ്പരവിശ്വാസമില്ലായ്മയും വർദ്ധിപ്പിക്കാനും അത് ഇടവരുത്തുന്നുണ്ട്.( ബ്ലോഗ് ആസ്വാദന കമന്റുകളെ വിമർശിച്ച തൂപ്പുകാരിയ്ക്ക് എത്രമാത്രം അനോണി കമന്റുകളാണ് ലഭിച്ചതെന്ന് നോക്കുക.)

 4. മറ്റൊന്ന്, ആരാണ് തന്നെ വിമർശിച്ചത് എന്നറിയാനുള്ള ഒരാളൂടെ അവകാശത്തെ സംബന്ധിച്ചാണ്. ഒരു പൗരനെന്ന നിലയിൽ അങ്ങനെയൊരു ജനാധിപത്യാവകാശം എല്ലാവർക്കുമുണ്ട് എന്ന് കരുതുന്നു. സുസ്മേഷ് ചന്ദ്രോത്താണോ അതോ ആനന്ദൻ മത്തങ്ങാതലയിൽ ആണൊ എന്റെ കഥയെ അഭിനന്ദിച്ചത്/വിമർശിച്ചത്  എന്നറിയാൻ എനിക്കവകാശമുണ്ട്. ഇനി, സുസ്മേഷ് ചന്ദ്രോത്തും ആനന്ദൻ മത്തങ്ങാതലയിലും അനസൂയ ദിവാകരനും ചേർന്ന ഒരു ഗ്രൂപ്പിന്റേതാണ് ആ അഭിപ്രായമെങ്കിൽ, അവർ മൂന്നുപേരും ആ ഗ്രൂപ്പിലുണ്ട് എന്നെങ്കിലും  എനിക്ക് അറിയാൻ അവകാശമുണ്ട്.

5. ബൂലോഗത്തെ ഒരു ബ്ലോഗർ എന്ന നിലയ്ക്ക്  ബ്ലോഗർമാർക്കിടയിലുള്ള  സമത്വം ലംഘിച്ചു കൊണ്ട്, എനിക്ക് നിങ്ങളെ മറഞ്ഞിരുന്ന് വിമർശിക്കാൻ അവകാശമുണ്ട് എന്ന അധികാരത്തിലേക്ക് ചിലർ സ്വയം പ്രതിഷ്ഠിക്കുന്നതിലെ ജനാധിപത്യവിരുദ്ധതയാണ് മറ്റൊന്ന്. വിമർശനം,  വാക്കും പ്രവൃത്തിയും തമ്മിലുള്ള  ബന്ധം പരിശോധിക്കൽ ഇതെല്ലാം നല്ല ജനാധിപത്യം പുലരുന്നതിന് അത്യാവശ്യമാണ്.   വെളിച്ചത്തിലിരിക്കുന്ന ഒരാളെ ഇരുട്ടത്തിരിക്കുന്ന മറ്റൊരാൾക്ക് വിമർശിക്കാൻ എളുപ്പമാണ്. പക്ഷെ അവിടെ ജനാധിപത്യത്തിനു പൂർണ്ണത ലഭിക്കണമെങ്കിൽ, ഇരുട്ടത്തിരിക്കുന്നയാൾ വെളിച്ചത്തിലേക്ക് വരികയും വിമർശനത്തിനു വിധേയനാവുകയും  ചെയ്യേണ്ടതുണ്ട്.




28 comments:

  1. ഇരിപ്പിടം വഴി രണ്ടു മൂന്നു പേര്‍ ബ്ലോഗില്‍ എത്തിയതിനു എനിക്ക് നന്ദിയുണ്ട് .

    ഈ വിഷയത്തെ കുറിച്ച രണ്ടു മൂന്ന് വിഡ്ഢിമാന്‍ പോസ്റ്റുകളില്‍ അഭിപ്രായം പറഞ്ഞിരുന്നു . ബ്ലോഗര്‍മാര്‍ക്ക് നന്മയാവുന്ന നിലയില്‍ ചര്‍ച്ച നടക്കട്ടെ .

    കൂടെ പറയാനുള്ള ഒരു കാര്യം , മോശം സൃഷ്ടികളെ തളര്‍ത്തുക ; എന്നാലോ അതെഴുതിയ മോശക്കാരെ വളര്‍ത്തി മിടുക്കന്മാരാക്കുക . അല്ലാതെ മുഖസ്തുതിയും പുറം ചൊറിയലും ബ്ലോഗ്‌ ലോകത്തിന്റെ നിലവാരം കൂട്ടാന്‍ ഒട്ടും സഹായകമല്ല .

    ReplyDelete
    Replies
    1. മുഖം മറച്ച് വിമർശനമെഴുതുന്ന പ്രവണത വർദ്ധിച്ചാൽ മുഖസ്തുതിയും പുറം ചൊറിയലും കൂടാനാണ് സാദ്ധ്യത എന്നാണ് എന്റെ കാഴ്ച്ചപ്പാട്, ഷിബിലി

      Delete
  2. മനോജിന്റെ നിരീക്ഷണങ്ങളോടു യോജിക്കുന്നു.

    ആത്മാർത്ഥതയോടെയും പക്ഷപാതിത്വമില്ലാതെയും വിമർശിക്കുമ്പോൾ വിരലിലെണ്ണാവുന്ന ചില ശത്രുക്കൾ ഉണ്ടാകാമെന്നത് സത്യമാണ്. എന്നാൽ അത്തരക്കാരെ അവഗണിച്ച് മുന്നോട്ടുപോയാൽ ബഹുഭൂരിപക്ഷം വരുന്ന നിഷ്പക്ഷമതികൾ കൂടെയുണ്ടാവുമെന്ന് ഇരിപ്പിടം മനസ്സിലാക്കുമെന്നാശിക്കുന്നു. അപ്പോൾ രഹസ്യാത്മകതയുടെ ആവശ്യം ഉദിക്കുന്നില്ല.

    ReplyDelete
    Replies
    1. അഭിപ്രായത്തിനു നന്ദി, നാസർ

      Delete
  3. മനോജിന്റെ ഈ നിര്‍ഭയ നിലപാടിന് എന്‍റെ ബിഗ്‌ സല്യൂട്ട്

    ReplyDelete
    Replies
    1. ഇത് ഭയമില്ലായ്മയുടെ ലക്ഷണമാക്കി കണക്കാക്കിയാൽ യഥാർത്ഥ ധീരന്മാർ എന്നെ തല്ലും !..

      ഏതാനും ഓൺലൈൻ സൗഹൃദങ്ങളും കമന്റുകളും നഷ്ടപ്പെട്ടേക്കാം ഒന്ന ഒരൊറ്റ സാധ്യത മാത്രമെ ഈ നിലപാടെടുക്കുമ്പോൾ പരിഗണിച്ചുള്ളു.അങ്ങനെ സംഭവിച്ചാൽ ദുഖമുണ്ടാകുമെങ്കിലും, അതത്ര വലിയ കാര്യമായി തോന്നുന്നില്ല.

      Delete
  4. ഈ വിഷയത്തിലെ രാഷ്ട്രീയം എന്തെന്നതിൽ ഞാൻ അജ്ഞനാണ് . മനോജ്‌ പറഞ്ഞതിലുള്ള ഒരു പ്രധാന പോയിന്റ് ഇതിൽ ജനാധിപത്യമില്ല എന്ന് തന്നെയാണ് .. മുന്നിൽ വന്നു അഭിനന്ദിക്കുകയും പിന്നിലൂടെ വിമര്ശിക്കുകയും ചെയ്യുന്ന രീതി സത്യത്തിൽ എന്നെ ആശയക്കുഴപ്പത്തിലാക്കുകയാണ് ചെയ്തത് . ... കാരണം , ഞാനാദ്യം കരുതിയത് , ഇത് വായിച്ചു ആത്മാർഥമായ അഭിപ്രായമാണ് താഴെ കാണുന്നത് എന്നായിരുന്നു . എന്നാൽ , സ്ഥിരമായി ബ്ലോഗുകൾ സന്ദര്സ്ചിക്കുന്ന ഒരാൾ എന്ന നിലയില അതിലെ കാപട്യം ബോദ്യപ്പെടാൻ അവസരമുണ്ടായി .... ചില പ്രത്യേക ഭാഗങ്ങളിൽ വല്ലാത്ത പുകഴ്ത്തലും , ചില നല്ലയിടങ്ങളിൽ എത്തി നോക്കുക പോലും ചെയ്യാത്തത് കണ്ടു .... ഘടനാപരമായി (എന്റെ അറിവില നിന്നുള്ള വിശകലനമാണ് ) നമ്മുടെ വായനയുടെ മൂല്യം വെച്ച് അളന്നാലും വളരെത്താഴെ ഇരിക്കുന്ന പലതിനെയും വാനോളം പുകഴ്ത്തിക്കണ്ടു ... ഈ പ്രവണത ഒരാളെയും വളര്ത്താൻ ഉതകുന്നതല്ല. തിരിച്ചറിയാനും , വിമര്ശനങ്ങളെ സ്വയം പരിശോധിച്ച് സ്വീകാര്യമെങ്കിൽ അതിൽ വേണ്ട മാറ്റങ്ങൾ വരുത്താനും തയ്യാറാവുന്ന രീതിയിലേക്ക് കൊണ്ട് വരണമെങ്കിൽ മുഖം കൊടുത്ത് തന്നെ അഭിപ്രായം പറയണം ..
    ആ നിലക്ക് ഒരു നിഗൂഡതയിൽ നിന്ന് വരുന്ന ഉത്തരം ഒരു കൊക്കസിന്റെ ഭാഗമാണെന്നും , അത് ചില പ്രത്യേക ആളുകളെ തളര്ത്താനും വളര്ത്താനും ഉള്ളതാണെന്നും ആരെങ്കിലും ധരിച്ചാൽ അതിൽ തെറ്റ് പറയാനാവില്ല .

    മനോജ്‌ പറഞ്ഞ ചില കാര്യങ്ങളോട് യോജിക്കുന്നു ... വിയോജിപ്പ് തോന്നുന്ന കാര്യങ്ങളുടെ രാഷ്ട്രീയം അറിയാത്തത് കൊണ്ട് അത് ഇവിടെ ഉപേക്ഷിക്കുന്നു ... യോജിപ്പിൽ ഒത്തു ചേരാനാണ് ഇഷ്ടം .

    ___________________________________
    ഇരിപ്പിടത്തോട് ഒരു തിരുത്തുണ്ട് ..... "മിനാരങ്ങൾ " ഒരു അടഞ്ഞ വായന ആയിരുന്നില്ല ... അതിൽ ഇരിപ്പിടം ശ്രദ്ധിക്കപ്പെടാതെ പോയ രണ്ടു പേരുടെ ജീവിതവും , നന്മയിലേക്ക് ഒരാളെ വലിച്ചടുപ്പിക്കുന്ന ആത്മീയതയും , സമകാലിക രാഷ്ട്രീയത്തെ നിസ്സരമാക്കലും ഉണ്ടായിരുന്നു (ഇത് ഒരു മുഖ്യധാരക്കാരന്റെ അഭിപ്രായം കൂടിയാണ് .. എന്നാൽ അദ്ദേഹം പറഞ്ഞ ദോഷങ്ങൾ നമ്മൾ തിരിച്ചറിഞ്ഞതുമില്ല )... പക്ഷെ ആരും മുഖം തരാത്ത സ്ഥിതിക്ക് ഒരു വിശദീകരണം ആവശ്യമുണ്ടെന്നു തോന്നിയില്ല ( ആരും മുന്നോട്ടു വരാത്തതു കൊണ്ട് ഈ വിഷയം ഇനി ചര്ച്ചയിലും വേണ്ട - സാന്ദർഭികമായി പറഞ്ഞെന്നെയുള്ളൂ )
    ____________________________________



    ReplyDelete
    Replies
    1. ബോധപൂർവം ഇതിൽ ഒരു രാഷ്ട്രീയവും കലർത്താൻ ശ്രമിച്ചിട്ടില്ല ശിഹാബ്. ആവർത്തിച്ചു കൊണ്ടിരിക്കുന്നത് ശരി എന്നു തോന്നുന്ന കാര്യങ്ങൾ മാത്രമാണ്. അത് ശരി തന്നെയാണോ എന്ന നിരന്തര അന്വേഷണം കൂടിയാണിത്. തെറ്റ് എന്നു ബോധ്യപ്പെട്ടാൽ ഇത് തിരുത്താനും മടിയില്ല. പക്ഷെ അങ്ങനെ ബോധ്യപ്പെടുന്ന രീതിയിലുള്ള ഒരു മറുവാദം ഇതുവരെ കണ്ടെത്താൻ കഴിഞ്ഞില്ല. അതാണു പ്രശ്നം.

      Delete
  5. വിമര്‍ശനങ്ങളെ വിമര്‍ശിക്കാനും സമയം കണ്ടെത്തിയതിനു സലാം.. നല്ലതോ ചീത്തതോ.. എഴുതുന്നവര്‍ സ്വന്തം മുഖത്തില്‍ നിന്നും എഴുതുക. മറവ് കാപട്യമാണ്. അതിനി ഇരിപ്പിടം ആണെങ്കിലും ഇരിക്കാന്‍ പറ്റാത്ത ഇടമാണെങ്കിലും.

    ReplyDelete
  6. എന്തോ , ഇരിപ്പിടത്തെ ഇത്ര പൊക്കിക്കൊണ്ട് നടക്കുന്നത് കാണുമ്പോള്‍ ചിരിയാണ് വരുന്നത് . കുറെ ബ്ലോഗിലെ എമാന്മാര്‍ ഇറങ്ങിയിര്‍ക്കുന്നു, മലയാളം ബ്ലോഗിനെ ഉദ്ധരിക്കാന്‍ .... ഇരിപ്പിടവും നാലാമിടവും എന്നൊക്കെയുള്ള പേരില്‍ ...
    വിഡ്ഢിമാന്റെ പക്ഷത്തോട് യോജിക്കുന്നു . പക്ഷെ ഈ ഇരിപ്പിടത്തെ ഒക്കെ ഇങ്ങനെ പൊക്കിക്കൊണ്ട് നടക്കണോ ..?

    പിന്നെ ഒരു കാര്യം കൂടി

    >>> Nassar Ambazhekel7:09 AM, May 05, 2013
    മനോജിന്റെ നിരീക്ഷണങ്ങളോടു യോജിക്കുന്നു.

    ആത്മാർത്ഥതയോടെയും പക്ഷപാതിത്വമില്ലാതെയും വിമർശിക്കുമ്പോൾ വിരലിലെണ്ണാവുന്ന ചില ശത്രുക്കൾ ഉണ്ടാകാമെന്നത് സത്യമാണ്. എന്നാൽ അത്തരക്കാരെ അവഗണിച്ച് മുന്നോട്ടുപോയാൽ ബഹുഭൂരിപക്ഷം വരുന്ന നിഷ്പക്ഷമതികൾ കൂടെയുണ്ടാവുമെന്ന് ഇരിപ്പിടം മനസ്സിലാക്കുമെന്നാശിക്കുന്നു. അപ്പോൾ രഹസ്യാത്മകതയുടെ ആവശ്യം ഉദിക്കുന്നില്ല.>>>>>>>

    ബ്ലോഗ്ഗന്‍ എന്നപേരില്‍ അനോണിയായി ബ്ലോഗ്‌ എഴുതുന്ന നാസര്‍ ഇക്കയാനെന്നു , നമുക്ക് കുറച്ചു പേര്‍ക്ക് മാത്രം അറിയാവുന്ന രഹസ്യമാണ് . നമ്മുടെ തന്നെ ഇ മഷി മാഗസിന്റെ എഡിറ്റോറിയല്‍ കൈകാര്യം ചെയ്യുന്ന നാസര്‍ ഇക്ക ബ്ലോഗ്ഗെന്‍ എന്ന അനോണിയായി ഇ മഷിയെയും , നമ്മുടെ ഗ്രൂപിനെയും ഒക്കെ പോസ്റ്റ് എഴുതിയിട്ടില്ലേ ..?
    പിന്നെ ഇവിടെ എങ്ങനെ , ഇങ്ങനെ പറയുന്നു ?
    (നാസര്‍ ഇക്ക ക്ഷമിക്കുക. നമ്മള്‍ തമ്മിലുള്ള സൌഹൃദങ്ങള്‍ തകരാതിരിക്കാനാണ് ഞാന്‍ ഈ കമെന്റ്റ്‌ അനോണിയായി ഇട്ടത്.

    ReplyDelete
    Replies
    1. യോജിപ്പിനു നന്ദി..
      ഇരിപ്പിടത്തെ ഇങ്ങനെ പൊക്കി കൊണ്ടു നടക്കുന്നതുകൊണ്ടല്ലേ അനോണിചേട്ടന്റെ യോജിപ്പ് എനിക്കറിയാൻ കഴിഞ്ഞത്.. അതൊരു ചെറിയ കാര്യമാണോ ? :)

      ജനാധിപത്യം ശക്തമല്ലാത്തയിടങ്ങളിൽ, സ്വേച്ഛാധിപത്യം ഉള്ളയിടങ്ങളിൽ, മറഞ്ഞിരുന്ന് വിമർശിക്കുക ചിലപ്പോൾ വേണ്ടി വന്നേക്കാം. പക്ഷെ അത് ആ ലക്ഷ്യത്തിന്റെ നന്മ കൊണ്ട് സാധൂകരിക്കപ്പെടണം.

      ബ്ലോഗൻ എന്നത് ആരാണ് എന്ന് സമൂഹം മുമ്പാകെ അവതരിപ്പിച്ചാൽ അതുകൊണ്ട് സമൂഹത്തിനു നേട്ടമുണ്ടാവുകയാണെങ്കിൽ, അദ്ദേഹവുമായുള്ള സൗഹൃദം വേണ്ടെന്നു വച്ചിട്ടായാലും താങ്കളത് ചെയ്യണം അനോണി..പക്ഷെ അതിനു കേവലം ഇങ്ങനെയൊരു പ്രസ്താവന പോരാ..മാത്രമല്ല, അതിനു താങ്കളും സ്വന്തം മുഖത്തോടെ പുറത്തു വരേണ്ടതുണ്ട്.

      Delete
    2. കാലില്ലാത്തവന്‍ വിരല്‍ ഇല്ലാത്തവനെ കുറ്റം പറയുന്നു. നീ ഏതാടാ അനോണി ?

      Delete
    3. This comment has been removed by the author.

      Delete
    4. "ബ്ലോഗ്ഗന്‍ എന്നപേരില്‍ അനോണിയായി ബ്ലോഗ്‌ എഴുതുന്ന നാസര്‍ ഇക്കയാനെന്നു , നമുക്ക് കുറച്ചു പേര്‍ക്ക് മാത്രം അറിയാവുന്ന രഹസ്യമാണ് . നമ്മുടെ തന്നെ ഇ മഷി മാഗസിന്റെ എഡിറ്റോറിയല്‍ കൈകാര്യം ചെയ്യുന്ന നാസര്‍ ഇക്ക ബ്ലോഗ്ഗെന്‍ എന്ന അനോണിയായി ഇ മഷിയെയും , നമ്മുടെ ഗ്രൂപിനെയും ഒക്കെ പോസ്റ്റ് എഴുതിയിട്ടില്ലേ ..?
      പിന്നെ ഇവിടെ എങ്ങനെ , ഇങ്ങനെ പറയുന്നു ?
      (നാസര്‍ ഇക്ക ക്ഷമിക്കുക. നമ്മള്‍ തമ്മിലുള്ള സൌഹൃദങ്ങള്‍ തകരാതിരിക്കാനാണ് ഞാന്‍ ഈ കമെന്റ്റ്‌ അനോണിയായി ഇട്ടത്."

      ഊഹങ്ങളുടെ ബലത്തിൽ ഇത്തരം ഒരാരോപണം എനിക്കെതിരേ ഉന്നയിച്ച ഒരാളെ ഞാൻ സുഹൃത്തായി ഗണിക്കുന്നില്ല. യുക്തമെന്നു തോന്നിയ ഒരു സന്ദർഭത്തിൽ ആ ബ്ലോഗിലെ ഒരു ലിങ്ക് ഞാൻ ഷെയർ ചെയ്തതോ അതുമല്ലെങ്കിൽ ആ ബ്ലോഗിലെ ഒന്നുരണ്ടു പോസ്റ്റുകളിൽ ഞാൻ കമന്റ് ചെയ്തതോ ആവാം താങ്കളെ ഇങ്ങനെയൊരു മണ്ടത്തം പറയാൻ പ്രേരിപ്പിച്ചതെന്നു ഞാനൂഹിക്കുന്നു. ബ്ലോഗൻ എഴുതുന്നതുപോലെ ഒരു പോസ്റ്റ് എഴുതാൻ കഴിഞ്ഞാൽ ഞാനത് സ്വന്തം പേരിലേ പ്രസിദ്ധീകരിക്കൂ. എന്റെ പേര് ബ്ലോഗന്റെതുമായി കൂട്ടിക്കെട്ടിയത് അദ്ദേഹം ക്ഷമിക്കട്ടെ!

      Delete
    5. അഹഹഹ നാസര്‍ ഭായ് നിങ്ങള്‍ക്കും ശത്രുക്കളോ ???

      Delete
  7. മറഞ്ഞിരുന്ന് വിമര്‍ശിക്കുന്നതിന് കാരണം മുഖ്യമായിട്ട് പറയുകയാണെങ്കില്‍ വിമര്‍ശിച്ച ശേഷം ആര്‍ക്കും ഒരു സര്‍ഗസൃഷ്ടി നടത്താന്‍ ഭയം തോന്നുമെന്നത് തന്നെയാണ്.
    വിമര്‍ശനവും എഴുത്തും ഒരുപോലെ കൊണ്ടുപോകുന്ന പ്രതിഭകളെത്രപേര്‍ കാണും?
    എനിയ്ക്ക് നാളെ ഒരു കഥ എഴുതാനുണ്ടെങ്കില്‍ ഞാന്‍ ഇന്ന് വായിയ്ക്കുന്ന കഥയുടെ കുറ്റങ്ങളും കുറവുകളും എങ്ങനെ എഴുതും?
    കുറവുകള്‍ പറയുന്ന ഒരുവന്റെ ബ്ലോഗില്‍ ആ കൈക്കുറ്റപ്പാടെല്ലാം തീര്‍ന്ന ഒരു രചനയായിരിയ്ക്കും ചുറ്റുമുള്ളവര്‍ പ്രതീക്ഷിക്കുന്നത്. അത് തികച്ചും ന്യായവുമാണ്.
    അതുമാത്രമാണ് ഐഡന്റിറ്റി കാണിച്ചുകൊണ്ട് വിമര്‍ശിക്കുന്നതില്‍ നിന്നും പലരെയും തടയുന്നത്.
    അല്ലെങ്കില്‍ വിമര്‍ശനം / നിരൂപണം എന്ന ശാഖയില്‍ മാത്രം ഉറച്ചുനില്‍ക്കാന്‍ തീരുമാനിച്ചവരാകണം.

    എത്ര നിര്‍ബന്ധിച്ചാലും എം കൃഷ്ണന്‍ നായര്‍ കഥ എഴുതുകയില്ലായിരുന്നു. എന്നാല്‍ മനോരമ പത്രാധിപര്‍ വിടാതെ പിന്നാലെ കൂടി ഒരു ഓണപ്പതിപ്പില്‍ അദ്ദേഹത്തിന്റെ കഥ ചോദിച്ചുവാങ്ങി. ഒരു മണവും ഗുണവുമില്ലാതെ ലേഖനം പോലെ ആയിരുന്നു ആ കഥ. അത് വായിച്ച് പലരും മനോരമ എഡിറ്ററോട് ഇങ്ങനെ പറഞ്ഞുവത്രെ:

    “മലയാളസാഹിത്യത്തിന് മനോരമ നല്‍കിയ ഏറ്റവും വലിയ ഒരു സംഭാവനയാണ് ഈ കഥ പ്രസിദ്ധീകരിച്ചത്”

    (അവലംബം: തോമസ് ജേക്കബ്, കഥക്കൂട്ട്, മലയാള മനോരമ)

    സത്യം ബൃയാത്, പ്രിയം ബൃയാത്, നഃ ബൃയാത് സത്യമപ്രിയം

    ReplyDelete
    Replies
    1. വായിക്കുമ്പോൾ അഭിപ്രായം പറയുന്നത്, ഒരെഴുത്തുകാരന്റെ ഉള്ളിലെ വായനക്കാരനാണ്. എഴുതുന്നത്, ഉള്ളിലുള്ള എഴുത്തുകാരനും. രചന നടത്തുമ്പോൾ തന്നിലെ വായനക്കാരൻ ഉയർത്തിയ വിമർശനങ്ങൾ ഓർത്തു വെക്കുന്നത്, തന്റെ സൃഷ്ടികളിൽ ആ കുറവുകൾ വരാതിരിക്കാൻ എഴുത്തുകാരനെ ജാഗ്രത്താക്കും.'ചവറാണൊ' എന്ന് സ്വയം സംശയിക്കുന്നതുപോലും അഭിനന്ദനങ്ങൾ പ്രതീക്ഷിച്ച് പോസ്റ്റ് ചെയ്യുന്ന പ്രവണതയും കുറയും. അത് സാഹിത്യത്തിനു ഗുണമേ ചെയ്യൂ എന്ന് കരുതുന്നു.നേരെ മറിച്ച് മുൻപ് താനുയർത്തിയ വിമർശനങ്ങൾ മൂലമുള്ള സമ്മർദ്ദം കൊണ്ട് ഇനി എഴുതേണ്ട എന്നൊരാൾ തീരുമാനിക്കുമോ എന്ന് സംശയമാണ്. മുഖ്യധാരാ മാധ്യമങ്ങളിൽ വരുന്ന പ്രസിദ്ധരായ എഴുത്തുകാരുടെ സൃഷ്ടികൾ പോലും ബ്ലോഗിലും ഫേസ്ബുക്ക് ഗ്രൂപ്പുകളിലുമെല്ലാം വിമർശിക്കുന്ന ധാരാളം എഴുത്തുകാർ ഓൺലൈനിൽ ഉണ്ട്. അതിനു ശേഷം ഇവരെല്ലാം കഥയെഴുത്തും കവിതയെഴുത്തും നിർത്തിയതായി ശ്രദ്ധയിൽ പെട്ടിട്ടില്ല.

      മുഖ്യധാരയിലുള്ള എഴുത്തുകാരും മറ്റുള്ള എഴുത്തുകാരെ വിമർശനബുദ്ധ്യാ വിലയിരുത്തുന്നതും തീർത്തും അപൂർവമൊന്നുമല്ല.ഇന്ന്, നോവലുകൾക്കും കഥാസമാഹാരങ്ങൾക്കും ആമുഖവും പഠനവുമെല്ലാം എഴുതുന്നത് മിക്കപ്പോഴും സാഹിത്യകാരന്മാർ തന്നെയല്ലേ ?

      മുഖ്യധാരയെ വച്ചു നോക്കുമ്പോൾ, ബ്ലോഗ് ലോകത്ത് നിരൂപണം മാത്രം ചെയ്യുന്നവർ വിരളമാണ് എന്നത് സത്യം തന്നെ. നിരൂപകരാവുന്നവർ, സ്വന്തം സൃഷ്ടികളെയും വിമർശനദൃഷ്ട്യാ പരിശോധിക്കണം എന്ന ഒരൊറ്റ മാറ്റമേ ഒരാൾ തന്നെ നിരൂപകനും സാഹിത്യകാരനുമാകുമ്പോൾ വരുന്നുള്ളു. എം. കൃഷ്ണൻ നായർ, സ്വന്തം കഥയോട് അങ്ങനെയൊരു സമീപനം എടുക്കാതിരുന്നതുകൊണ്ടല്ലേ 'മണവും ഗുണവുമില്ലാത്ത ലേഖനം പോലൊരു കഥ' മനോരമയിൽ വന്നത് ?

      അപ്രിയകരമായ സത്യങ്ങൾ പറയരുത് എന്ന നിലപാട് വ്യക്തിപരമായ സുരക്ഷയും സ്വീകാര്യതയും നൽകുന്നു എന്നതിൽ തർക്കമൊന്നുമില്ല. പക്ഷെ ഒരു സമൂഹത്തിലെ എല്ലാ അംഗങ്ങളും അതേ നിലപാടെടുത്താൽ അത് സമൂഹത്തിനു ഗുണകരമാവുമെന്ന് അജിത്തേട്ടൻ കരുതുന്നുണ്ടോ ? സുഹൃത്ത് പണം മോഷ്ടിക്കുന്നത് കണ്ടു എന്ന് കോടതിയിൽ മൊഴി നൽകേണ്ടയാൾ 'അപ്രിയകരമായ സത്യം'ആയതു കൊണ്ട് അത് പറയണ്ട എന്നു തീരുമാനിച്ചാൽ എങ്ങനെയാണ് നീതി നടപ്പാവുക ?

      വിമർശിക്കുന്നതുകൊണ്ടുള്ള ദോഷങ്ങൾ മുൻനിർത്തി, എല്ലാ ബ്ലോഗർമാരും വിമർശനത്തിനായി അനോണി രൂപത്തിലെത്തുന്നതിനോട് അജിത്തേട്ടൻ യോജിക്കുന്നുണ്ടോ ? അതു കൊണ്ട് ബ്ലോഗ് ലോകത്ത് യുദ്ധമോ സമാധാനമോ വർദ്ധിക്കാൻ സാദ്ധ്യത ?

      'മലയാളസാഹിത്യത്തിന് മനോരമ നല്‍കിയ ഏറ്റവും വലിയ ഒരു സംഭാവനയാണ് ഈ കഥ പ്രസിദ്ധീകരിച്ചത്”' എന്ന വായനക്കാരുടെ അഭിപ്രായം തന്നെ 'ന ബ്രൂയാത് സത്യമപ്രിയം' എന്ന വാക്യത്തിനനുസൃതമല്ലേ ? അങ്ങനെയെങ്കിൽ അതിനെ വിമർശിക്കാൻ പാടുണ്ടോ ?

      Delete
  8. ഇത് വിഡ്ഢിയും ഫേസ്‌ബുക്കിലെ ആളു കേറാത്ത ഒരു മലയാളം ബ്ലോഗ്‌ ഗ്രൂപ്പിലെ അംഗങ്ങളും ഒത്തുചേര്‍ന്ന കളിയാണ്. എന്നോ നടന്ന കുറെ ബ്ലോഗ്‌ കമന്റ് താങ്ങിപ്പിടിച്ചു വിഡ്ഢി കുറെ വായനക്കാരെ വിഡ്ഢികളാക്കി കളിക്കുന്ന ഈ കളി ആര്‍ക്ക് വേണ്ടിയാണെന്ന് എല്ലാര്‍ക്കും അറിയാം.... 'തൂപ്പുകാരി'യായി ഒരിക്കല്‍ അനോണിയില്‍ വന്നു പരാജയപ്പെട്ട വിഡ്ഢി, ഇരിപ്പിടത്തിലെ ചില ബുജികളുടെ കൂടെ കൂടി ഇപ്പോള്‍ അനോണിയായി ഇരിപ്പിടത്തില്‍ നമ്മുടെയൊക്കെ പോസ്റ്റ്‌ വിമര്‍ശികുന്നു.....എന്നിട്ട് അവിടെയും മറ്റു ഗ്രൂപ്പുകളിലും വന്ന് അനോണി എഴുത്തിനെ വിമര്‍ശിച്ച് ഇരിപ്പിടത്തിലേക്ക് വായനക്കാരെ കൂട്ടുന്നു.... വിഡ്ഢിമാന്റെ ഈ ബുദ്ധിമാന്‍ കളി അറിയാതെ ആട്ടം കാണുന്ന കുറെ പാവം ബ്ലോഗര്‍മാരും....

    ഇങ്ങിനെ ഒരു നിരീക്ഷണം നടത്താന്‍ ഉള്ള കാരണങ്ങള്‍ ചുവടെ----
    1) വിഡ്ഢി ഈ കമന്റ് ആദ്യം ഇരിപ്പിടത്തില്‍ ഇടുന്നു, അങ്ങിനെ അത് വിവാദമാക്കുന്നു.
    2)അതിനു ശേഷം ഇതേ വിഷയം മറുപടി കിട്ടുന്നില്ല എന്ന് പറഞ്ഞു ഇരിപ്പിടം എഫ് ബി ഗ്രൂപ്പില്‍ ഇടുന്നു.അവിടെ ഒരു ചര്‍ച്ചയും നടത്താതെ വിഡ്ഢി പിന്നീട് നമ്മുടെ ഗ്രൂപ്പില്‍ ഇടുന്നു.
    3)അതിനു ശേഷം വീണ്ടും മറ്റേ ഗ്രൂപ്പില്‍ ഇതേ പോസ്റ്റ്‌ ഇടുന്നു. അതിനിടെ ഇരിപ്പിടത്തിന്റെ ലിങ്ക് കച്ചവടം തകൃതിയായി നടക്കുന്നു.
    4)അവിടെ ചില കൊടുക്കല്‍ വാങ്ങല്‍ കമന്റ് യുദ്ധത്തിനു ശേഷം പിന്നീട് ചര്‍ച്ച ബ്ലോഗിലേക്കും മാറ്റുന്നു. ഇവിടെയും കൃത്യമായി ലിങ്കും ഒക്കെയുണ്ട്.
    ഇതൊക്കെ മതിയാവുമല്ലോ വിഡ്ഢി ഇരിപ്പിടത്തിന്റെ ഉല്സാഹക്കമ്മിറ്റി കണ്‍വീനര്‍ ആണെന്ന് തെളിയാന്‍. ആര്‍ക്കും ഒന്നും മനസിലാവില്ലെന്നു കരുതരുത്‌. എല്ലാവരെയും എന്നും പറ്റിക്കാമെന്നും.

    ReplyDelete
    Replies
    1. അനോണി ചങ്ങാതി,

      വിമർശനത്തിന്റെ ലക്ഷ്യം ഉന്മൂലനാശമല്ല.

      'x' പാർട്ടിയുടെ കൊലപാതക രാഷ്ട്രീയത്തെ വിമർശിക്കുന്നു എന്നതിനർത്ഥം, 'x' പാർട്ടി ഇതോടെ തുലഞ്ഞു പോകട്ടെ എന്നല്ല ( ആ ലക്ഷ്യത്തോടെ വായ തുറക്കുന്നവർ ഉണ്ടാകും, പക്ഷെ അത് ക്രിയാത്മകവിമർശനമല്ല ). നേരെ മറിച്ച്, വിമർശകന്റെ കാഴ്ച്ചപ്പാടിൽ, 'x' പാർട്ടി, 'രാഷ്ട്രീയ എതിരാളികളെയെല്ലാം ഹനിച്ച് ഇല്ലാതാക്കാം' എന്ന അതിന്റെ നയം തിരുത്തണം എന്നു മാത്രമാണ്.
      ആ വിയോജിപ്പ് ഒരു സാമൂഹ്യജീവി എന്ന നിലയ്ക്കാവാം, 'x' പാർട്ടി നിലനിൽക്കണം എന്നാഗ്രഹമുള്ള ഒരാളെന്ന നിലയ്ക്കാകാം.


      ഇതേ കാഴ്ച്ചപ്പാടു തന്നെയാണ് ഇരിപ്പിടത്തിൽ ബ്ലോഗർമാർ മറഞ്ഞിരുന്നെഴുതുന്നതിനോട് വിയോജിക്കുമ്പോഴും ഉള്ളത്. ഇരിപ്പിടത്തിന്റെ 'ഉത്സാഹകമ്മറ്റിയിൽ' ഒന്നുമില്ലെങ്കിലും ഇരിപ്പിടം നിലനിൽക്കണമെന്നാഗ്രഹമുണ്ട്.

      വിഡ്ഡിമാൻ തന്നെയാണു തൂപ്പുകാരി എന്നതിന് തെളിവുകൾ ഹാജരാക്കാൻ അഭ്യർത്ഥിക്കുന്നു.

      Delete
  9. വിമര്‍ശനം നല്ലതാണ്. വിമര്‍ശിക്കുന്നവര്‍ പേര് വെളിപ്പെടുത്തണം എന്നതാണെന്റെ വിശ്വാസം. പേര് വെളിപ്പെടുത്തിയാല്‍ ഒന്നും സംഭവിക്കില്ല (അനോണികള്‍ക്ക്‌ ദുഷ്ട ലാക്ക് ഒന്നും ഇല്ലെങ്കില്‍)
    )വിടടിമാന്റെ വിമര്‍ശനങ്ങള്‍ ഇഷ്ടമാണ്,കാരണം വിഡ്ഢി മാന്‍ ഒരനോണി അല്ലല്ലോ?

    ReplyDelete
  10. ഇരിപ്പിടം എവിടുന്നാ പ്രസിദ്ധീകരിക്കുന്നത്ഇസ്രേയല്‍ ആണോ ? മോസാദാണോ അവരുടെ അട്മിന്‍സ് !!! ഫയങ്കര രഹസ്യ സ്വഭാവം !!! ഇരിപ്പിടം പൂട്ടി മാറാല പിടിച്ച ഒരു സാദനമാണ്!! അതിലെ ആദ്യത്തെ ഭാഗങ്ങളൊക്കെ വായിക്കാറുണ്ട് പിന്നീടാണ് മനസ്സിലായത് നല്ല പൊറം ചൊറിയല്‍ ,മാന്തികൊടുക്കള്‍ ,തടവല്‍ സുഖിപ്പിക്കല്‍ ടീമാണ് അതെല്ലാം എന്ന് !!! ഒന്ന് പോകാന്‍ പറ മനോജ്‌ ഭായ് .... ചിരിവരുന്നു :DDDDDDDDDDDDDDDD

    ReplyDelete
    Replies
    1. ഹ ഹ ഹ ഹ ഹ.....
      "ഈ പൊട്ടന് മനസിലായി.
      എന്നിട്ടും ഈ ഒറിജിനല്‍ പൊട്ടന് മനസിലായിട്ടില്ല......"
      (കടപ്പാട് : പഞ്ചാബി ഹൗസ്‌) )

      ബ്ലോഗിലേക്ക് ആളെ കയറ്റാന്‍ ഓരോ വഴികളേയ്,
      അല്ല പിന്നെ..

      Delete
    2. താക്കോൽ നിന്റെ കയ്യിൽ ആണെന്ന കാര്യം ആരും അറിയരുത്
      താക്കോൽ ഒളിപ്പിച്ചല്ലോ. പിന്നെങ്ങിനെയാ എന്റെ കയ്യിൽ ഉണ്ടാവുക
      എന്നാലും നിനക്കറിയാലോ അത് എവിടെയാണെന്ന്
      അതല്ലേ ഞാൻ ഒളിപ്പിച്ചത്
      അതേ. അത് ഒളിപ്പിച്ചത് എവിടെയാണ് നിനക്കറിയാലോ
      ഒളിപ്പിചില്ലെ. അപ്പൊ എന്റെ കയ്യിൽ കാണില്ലല്ലോ
      എടാ പൊട്ടാ. അത് ആരോടും പറയരുത് എന്നാ പറഞ്ഞെ
      അതിനു എന്റെ കയ്യിൽ ഇല്ലല്ലോ
      എടാ₹%^^്്#@$v താക്കോൽ ഇപ്പൊ എവിടെ ഉണ്ട്
      പൂ ചെട്ടിയുടെ ഉള്ളിൽ
      അവിടെ വെച്ചേക്കു. പോ പോ പോടാ..

      അപ്പൊ ഒളിപ്പിക്കണ്ടേ
      വേണം. ഒളിപ്പിച്ചാൽ അത് നിന്റെ കയ്യിൽ ഉണ്ടെന്നു ആരും അറിയരുത്
      അതിനു ഒളിപ്പിച്ചാൽ എന്റെ കയ്യിൽ കാണില്ലല്ലോ . ഇയാളെന്തു വിഡ്ഢിമാനാ.
      പോടാ %₹%^^%&*%&^^*&

      ഇവിടെ ഒരു പൊട്ടൻ മറ്റൊരു പൊട്ടനെ സഹായിക്കാൻ എത്തിയപ്പോ ഓർമ്മ വന്നതു.

      Delete
    3. ഹ ഹ ഹ.. ശരിക്കും ചിരിച്ചു പോയി..

      ഇനിയും ഇതുപോലുള്ള തമാശകൾ ഇറക്കൂ അനോണി ചങ്ങാതീ..

      ഒരു നേരമ്പോക്കാകട്ടെ..

      Delete
  11. ഒരു സ്മൈലിയിൽ എല്ലാം ഒതുക്കട്ടെ ... :D

    ReplyDelete
    Replies
    1. നന്നായി.. തിരിച്ചും ഒരു സ്മൈലി.. :D

      Delete
  12. ‘വിമർശനം വേണം, പക്ഷെ ഞാനായിട്ടത് ചെയ്യില്ല. ചെയ്താൽ എനിക്കു കിട്ടുന്ന കമന്റുകൾ കുറയും, എന്നോട് വിദ്വേഷമുള്ളവർ കൂടും’ എന്ന് ബ്ലോഗർമാരിൽ ഭൂരിഭാഗവും ഉള്ളിൽ കരുതുന്നുണ്ട് എന്നാണ്. ( ഇതാണു ഇരിപ്പിടത്തിലും ബ്ലോഗർമാർ മറഞ്ഞിരുന്നെഴുതുന്നതിനു പ്രധാനകാരണം എന്ന് വിശ്വസിക്കുന്നു )

    ReplyDelete